Du kan få lån til ein nøktern og eigna bustad i Hareid kommune med omsyn til pris, storleik og standard.
Dersom du kan få lån til bustad i privat bank, får du ikkje startlån. Du får, med nokre unntak*, heller ikkje startlån dersom du har moglegheit til å spare naudsynt eigenkapital til lån i vanleg bank.
(* for barnefamiliar, personar som bur i kommunal bustad og personar med særlege sosiale eller helsemessige utfordringar kan det gjerast unntak frå kravet om sparing)
Det er i utgangspunktet ikkje mogleg å bruke startlån som eigenkapital for bustadlån i vanleg bank, men kvar enkelt bank kan gjere unntak frå utlånsforskriften.
Kommunen vil søke om nye lånemidlar frå Husbanken i byrjinga av 2025. Vi vil behandle startlånesøknadar fortløpande frå slutten av februar så langt midlane rekk. Vi behandlar søknadar overført frå 2024 først.
Kven kan få startlån?
Du kan få startlån dersom
- du er over 18 år
- du har langvarige bustadfinansieringsproblem
- du har fast inntekt eller er varig trygda
- du har økonomi til å betene renter og avdrag på lånet
Par må søke lån saman, og begge må stå ansvarlege for lånet.
Korleis søker du startlån?
Du finn meir informasjon om startlån og lenkje til søknadsskjema (innlogging med elektronisk ID) på Husbanken sine nettsider.
Du må laste opp følgjande vedlegg til søknaden:
- Løns- og/eller trygdeslippar for dei tre siste månadane
- Stadfesting på eigenkapital
- Rapport frå Gjeldsregisteret
- Dokumentasjon på gjeld
- Avslag på bustadlån i vanleg bank
Ved særskilde høve: - Ved tilrettelegging av bustad - legeattest og/eller ergoterapirapport
- Ved kjøp av konkret bustad - kjøpekontrakt/salsoppgåve/festekontrakt
- Ved utbetring - dokumentasjon på arbeidskostnadar
Kva skjer med søknaden din?
Vi behandlar søknaden din så raskt som mogleg. Alle søknadar på beløp over 300 000 kroner skal behandlast politisk i levekårsutvalet. Det er difor lang saksbehandlingstid.
Når du eventuelt har fått tilsegn på lån (finansieringsbevis), kan du legge inn bod på ein eigna bustad som kommunen har godkjent. Eigedomsmeklar vil då kontakte kommunen for å få stadfesta at du har tilstrekkeleg finansiering.
Når du har kjøpt bustad, må du sende inn signert kjøpekontrakt og informasjon om bustadforsikring. Vi set då i verk utbetaling av lånet til det tidspunktet du skal overta bustaden.
Klage
Du har 3 vekers klagefrist frå du mottar svar på søknaden din. Klagen skal stilast til Hareid kommune og må innehalde grunngjeving av klagen og eventuelt nye opplysningar i saka.
Lover og retningslinjer
Lov om Husbanken
Forskrift om lån frå Husbanken
Retningslinjer for startlån - Vedtekne LKU PS 36/15 (PDF, 466 kB)