I januar 2019 var folketalet i Hareid 5 155, det er ei endring på 5 personar (0,1 prosent) frå året før. Folketalsutviklinga er resultatet av fødselsoverskot pluss nettoflytting. Fødselsoverskotet er talet på fødde eit år minus talet dødde same år. I 2018 blei det fødd 48 barn samstundes som det dødde 51 personar i befolkninga. Det gav eit fødselsunderskot på -3. I 2017 var talet på fødde 63, døde 47 og fødselsoverskotet 16. Fødselstala er låge både regionalt og nasjonalt, og det er svært få kommunar kor fødselstala er høge nok til å oppretthalde befolkningsstorleiken utan tilflytting eller innvandring. 

Forutan fødselsoverskotet er det innanlandsflytting og innvandring som vil avgjere om ein kommune opplev vekst eller nedgang. For fylket samla er den innanlandske nettoflyttinga negativ, med eit flyttetap på kring 1000 personar årleg i tidsperioden sida 2012. No er talet innvandrarar til fylket lågare enn tidligare. Talet som utvandrar har auka dei seinare åra som ei følgje av nedturen i oljerelaterte næringar, men det kan sjå ut som det no har snudd. Nettoinnvandringa til Hareid var på 35 personar. Det er 18 personar høgare enn året før.

Det siste tiåret har folketalet i kommunen auka med 338 personar, som er ei endring på 7,0 prosent. Av dei 35 kommunane i fylket kjem kommunen på 11. plass i befolkningsutvikling i perioden. Folketalsutviklinga handlar om meir enn berre vekst eller nedgang i folketalet. Samansetninga av befolkninga er svært viktig for utviklinga, og ikkje minst for korleis det offentlege skal dimensjonere sitt tenestetilbod.

Per 1. januar 2019 hadde kommunen 1 299 barn og unge under 20 år, noko som tilsvarer 25,2 prosent av befolkninga. Talet på personar 67 år og eldre i befolkninga var 810 og utgjer 15,7 prosent. For fylket er delen barn og unge på 23,9 prosent, medan andelen eldre er 16,9 prosent.

Talet kvinner per 100 menn i aldersgruppa 20-39 år har vore lågt i Møre og Romsdal samanlikna med dei andre fylka i lengre tid. I 2019 er det 90,7 kvinner i aldersgruppa 30 til 39 år per 100 menn i Møre og Romsdal, medan det i Hareid er 88,2.

På statistisk sentralbyrå sine nettsider kan du få fleire tal om Hareid kommune.

Sysselsetting

Sysselsettinga i Hareid har hatt ei fin utvikling siste tida, men det er ynskjeleg å få ei betre arbeidsplassdekning. Per oktober 2019 var arbeidsløysa i Hareid kommune 2,7 prosent.

Samanlikninga med andre kommunar

Her er eksempel på faktatal (pr. 17.06.19) frå nokre område. Dei viser at kommunen bruker mindre ressursar enn både landet, fylket og andre i same kommunegruppe. Om ein går inn i tala ser ein at effektiviteten er på jamt stigande kurve frå 2017. Med dei kutta som ligg inne vil dette auke ytterlegare. At vi ligg rundt gjennomsnittet viser også at her er mange kommunar som driv langt billigare enn oss. Fleire av desse er også kjende for å levere god kvalitet. Her er det vi må hente inspirasjon no når vi treng å verte endå betre.

På denne sida kan du få detaljert, oppdatert statistikk frå Hareid kommune (SSB)

Hareid har høgare overføringar til soknet enn andre det er naturleg å samanlikne seg med. Rådmannen har difor ikkje lagt opp til auka løyvingar i driftsbudsjettet.
 

Administrasjonsundersøkinga

Ressursar brukt til administrasjon er alltid eit interessant tema i budsjettsamanhengar. Agenda Kaupang har gjennomført slike undersøkingar kvart år sidan 2010.  Kommunane som har tatt del i desse undersøkingane har meldt seg på etter invitasjon frå Agenda Kaupang.

Denne undersøkinga gir ikkje grunnlag for å seie kva som er den mest gunstige bemanninga av kommunen si administrative leiing. I Agenda Kaupangs si undersøking om erfaringane med flatstrukturorganiseringa i norske kommunar, fant dei imidlertid at kommunar som har prioritert å styrke den administrative bemanninga var betre rusta til å ivareta kommunen sine styrings- og utviklingsoppgåver.

Gjennom tidlegare undersøkingar har Agenda Kaupang sett at det har vorte meir og meir vanleg å finne fram til interkommunale samarbeidsløysingar innanfor økonomi, regnskap, opp-kreving av skatt og kommunale avgifter/gebyr, lønn, innkjøp og IKT.

Funn Hareid kommune:

Under administrativ leiing høyrer rådmann, assisterande rådmann og tre kommunalsjefar. Kvar kommunalsjef bruker i gjennomsnitt 0,4 årsverk kvar til administrativ leiing. Leiar for økonomi, personal og organisasjon, og servicetorg og politisk sekretariat er regna med under stab- og støtte.  Av figur 2-1 går det fram at Hareid har ei administrativ bemanning som ligg godt under gjennomsnittet for kommunar på same storleik.

Rådmannen sin kommentar:

Hareid kommune bruker lite ressursar til administrasjon. At vi har bygd assisterande eller rådgjevarar rundt toppleiinga er eit viktig strategisk grep, og heilt i tråd med råda både frå Agenda ­Kaupang og KS-konsulentane.

Her kan du gå tilbake til budsjettsida

Her kan du lese heile budsjettdokumentet (økonomi og handlingsprogam 2020-2023)