MS Artania MS Artania er det fyrste cruiseskipet som kjem til Hareid! (Foto: Trondheim havn, delt med CC2.0-lisens

Fakta om MS Artania

MS Artania er eit cruiseskip med 600 utvendige lugarar, alle romslege og komfortable, og nyoppussa i 2022 og 2024. Lugarane har ulike sengeløysingar, inkludert senger som kan brukast som sofa om dagen. Suitene har større senger, og Royal Suitene har store dobbeltsenger. Alle lugarane er utstyrte med SAT-TV, klimaanlegg, telefon, minibar, kaffimaskin, safe, hårfønar og bad med dusj/WC. Handkle og badekåper er tilgjengelege, og det er dagleg skifte av handkle ved ynskje.

Skipet har to hovudrestaurantar med panoramautsikt og eit Lido Buffet-Restaurant. Det er også mogleg å reservere bord i spesialitetsrestauranten Pichler's. I tillegg til hovudmåltida er det fleire matserveringar gjennom dagen, inkludert Captain's Dinner.

For underhaldning og avslapping finst det fleire barar, ein show-lounge, butikkar, kino, og eit spa- og velværeområde med treningssenter og sauna. Skipet har også bassengområde, promenadedekk og fleire sportsaktivitetar som shuffleboard og bordtennis.

MS Artania er 231 meter langt, 29 meter breitt og har 9 dekk. Skipet blei bygd i 1984 og har gjennomgått fleire renoveringar, sist i november 2024. Det har plass til 1.200 passasjerar og har ein mannskap på rundt 510 personar. Skipet seglar under Bahamas flagg og har tysk som ombordspråk. 

Kjelde: Phoenix reisen, omset ved hjelp av Copilot

Frå tidlegare har vi éi booking til sommaren 2026*. Vi kan no gå ut med at dette gjeld cruiseskipet MS Artania frå Pheonix Reisen, som kjem til Hareid med 1200 passasjerar den 13. juni 2026.  

Passasjerane som vil på dette cruiset kan allereie no bestille reisa si:

“Noregs landskap med bratte fjordveggar, imponerande fossar og vakre småstader kan ein oppleve på ein komfortabel måte med eit cruiseskip. Nyt om bord på MS Artania dei uforliknelege vakre panorama som berre den norske fjordverda kan tilby. Fordjup dei positive inntrykka i dette gjestfrie landet”, skriv dei om reisen.

I midten av februar kom det ei ny booking, denne gongen frå skipet World Voyager. Dette er eit mindre, meir eksklusivt cruiseskip med 200 passasjerar. Det kjem til Hareid den 29. juni i 2026.

Begge skipa skal legge til ved Ulmatec-kaia.

World Voyager kjem til Hareid 29. juni 2026. Foto: Nicko cruises, delt med CC4.0-lisens)

Men det stoppar ikkje med desse to skipa. Allereie komande veke besøk av to agentar frå DMC Nordic, som er agentar for fleire reiarlag. Dei skal få ein smakebit av det Hareid har å by på til cruiseturistane som kjem hit. Så interessa er stor.

LES OGSÅ: Wow! Amazing! Beautiful! - Dette sa cruiseagentane på Hareid-besøk

Det blir!

Linn Friedl er dagleg leiar i Hareid cruisenettverk. Ho har svært god tru på Hareid som cruisedestinasjon.

- Hareid har gått frå å vere eit uskrive blad til å verte ei hamn som agentane og rederia kjenner til. Når Hareid vert nemnt frå scena på den nasjonale cruisekonferansen til Kystverket i januar, så har vi gjort mykje rett. Så cruise på Hareid, det blir!, seier ho.

Til no har det vore gjort mykje godt arbeid med utvikling av produkt og produktpakkar med dei lokale aktørane, marknadsføring til ulike reiarlag og agentar, og salsturar med andre aktørar. På visningsturen som vart arrangert saman med Cruise Norway våren 2024, fekk mange av reiarlaga og agentane sjå meir av kva Hareid kan by på.

Av aktivitetar utover på våren kan vi nemne at Linn frå Hareid cruisenettverk skal vere med på Seatrade Miami i april, og Cruise Europe-konferansen i mai. Dette er svært gode arenaer for å reklamere for Hareid, og å få vise fram tilboda vi har her. I tillegg planlegg vi eit ope folkemøte, der alle som er interesserte i Hareid som cruisedestinasjon kan få meir informasjon.

No losnar det!

Vi ser allereie at fleire av reiselivsaktørane i Hareid dreg nytte av cruisesatsinga, ved at dei sel produktet sitt til cruiseturistar som kjem til Ålesund. Til dømes fortel Willy Nesset at Polarstar har dobla talet på turar med cruiseturistar frå Ålesund til Brandal, og at sommaren 2025 har dei booka over 40 turar allereie.

- Dette kjem som eit resultat av cruisesatsinga og hardt arbeid. No losnar det!, seier han, og legg til at han også gler seg over det dei har fått til på Hodr vikingsete.

Lokal verdiskaping

Målet med cruisesatsinga har heile tida vore å styrke det lokale næringslivet i Hareid kommune. Dette gjer vi ved både å styrke eksisterande bedrifter og produkt, og ved å satse på nye produkt og aktivitetar som kan skape nye heilårlege arbeidsplassar. Vekst i Hareid er difor inne i Hareid cruisenettverk, og finansierer satsinga ut år 2025. På sikt er tanken at nettverket skal finansierast gjennom medlemskontingent.

Spennande moglegheiter

- Vi som jobbar tett på cruisesatsinga vert meir og meir optimistiske med tanke på å få mange anløp til Hareid, og vi ser alle dei positive ringverknadane dette kan ha for det lokale næringslivet, seier Christine Erdal, prosjektleiar for Vekst i Hareid.

Og med tanke på at ein seier at det ofte tek ti år å etablere ein destinasjon som cruisehamn, så er Hareid svært godt i rute. Hareid har allereie fleire bookingar på plass, i tillegg til fleire rederi som seier at dei er svært interesserte i å kome hit. Framtida til Hareid som cruisehamn ser veldig lys ut!

* Dei med god hukommelse hugsar kanskje at det i 2024 var annonsert at vi skulle få to anløp i 2026. Det eine av desse anløpa vart kansellert ei stund seinare, så difor er det slik at vi no med den nye bookinga igjen er oppe i to anløp.