Leiande helsesjukepleiar Ann Elin Skeide Erlend Friestad

Helsestasjonsverksemda er frivillig og gratis, og omfattar helsestasjon 0–5 år, skulehelseteneste, helsestasjon for ungdom, jordmorteneste, smittevern og oppfølging av flyktningar og asylantar.

Tidleg støtte til små barn og foreldre

I 2025 vart det registrert 34 fødslar i Hareid. Dei fleste familiane fekk heimebesøk av helsesjukepleiar kort tid etter fødsel, medan andre valde oppfølging på helsestasjonen. Gjennom året vart det gjennomført både faste kontrollar og ekstrakonsultasjonar for barn i alderen 0–5 år.

Helsestasjonen har også gitt tilbod om barselgrupper, babymassasje og bassengtrening for gravide. Slike tiltak skal styrke foreldrerolla, gi rom for erfaringsdeling og bidra til ein trygg start på familielivet. I tillegg har helsesjukepleiarane vore ute i barnehagane og hatt helseopplysning for femåringar.

Kurs og rettleiing for foreldre

Ein viktig del av arbeidet ved helsestasjonen er å støtte foreldre i kvardagen. I 2025 har helsestasjonen hatt fleire ulike kurstilbod for foreldre, i tillegg til individuell rettleiing.

Tilbodet omfattar fødsel- og foreldreførebuande kurs for blivande foreldre, samt foreldrekurs i Tryggleikssirkelen (COS) og Tuning Into Teens (TINT). Kursa gir foreldre kunnskap og verktøy for å forstå og møte barn og ungdom sine behov på ein trygg og god måte.

Helsestasjonen tilbyr også individuelle foreldrerettleiingssamtalar, mellom anna PMTO-rådgjeving (Parent Management Training Oregon). I tillegg er Hareid del av eit interkommunalt tilbod med PMTO-terapi for familiar som har behov for meir omfattande oppfølging.

Skulehelsetenesta – mange samtalar, stort behov

Skulehelsetenesta har hatt svært høg aktivitet i 2025. Alle elevar har fått tilbod om helsesamtalar og vaksinering i tråd med nasjonale retningslinjer, og det har vore omfattande helseopplysning i grupper på både barne- og ungdomstrinnet.

Tema har mellom anna vore psykisk og fysisk helse, pubertet, sjølvbilde, vald og overgrep. På ungdomsskulen har det vore eigne jente- og gutegrupper, samt seksualundervisning. Samstundes viser tala at mange elevar har behov for individuelle samtalar utover det faste tilbodet. Helsesjukepleiarane samarbeider tett med skular, føresette og andre tenester for å sikre god oppfølging av barn og unge som treng ekstra støtte.

Helsestasjon for ungdom – låg terskel for å ta kontakt

Helsestasjon for ungdom har vore open kvar veke utanom skuleferiar, med både helsesjukepleiar og lege til stades. Tilbodet er retta mot ungdom og unge vaksne mellom 13 og 25 år, og omfattar både fysisk og psykisk helse, råd, rettleiing og samtalar. Tenesta nyttar også digitale kanalar for å nå målgruppa.

Samarbeid på tvers – og ansvar for særskilde oppgåver

Helsestasjonen deltek i ei rekkje samarbeidsmøte og ansvarsgrupper for barn med særlege behov, og har tett dialog med barnehagar, skular, barnevern og spesialisthelsetenesta. I tillegg har tenesta ansvar for flyktninghelseteneste og helsetilbod ved det kommunale asylmottaket.

I 2025 hadde helsestasjonen også ansvar for massevaksinering i kommunen. Om lag 800 personar fekk tilbod om influensa-, korona- eller pneumokokkvaksine.

Årsrapporten viser ei teneste med stort engasjement og brei kontaktflate mot innbyggarane. Samstundes peikar rapporten på at enkelte kurs og kompetansetiltak ikkje vart gjennomførte på grunn av låg påmelding eller kapasitetsutfordringar.

Slik tek du kontakt

Helsestasjonen ønskjer at fleire skal vite om tilbodet – også dei som ikkje nødvendigvis opplever å ha eit konkret behov i dag, men som kan ha nytte av rettleiing, kurs eller førebyggande oppfølging.

Meir informasjon om helsestasjonen og tilbodet der finn du på helsestasjonsportalen.