Ordførar Bernt Brandal og fylkesleiar for Nasjonalforeningen for folkehelse, Ingunn Øye, signerte avtalen. Silje Kiperberg Aksnes.

21. juni signerte Hareid kommune, ved ordførar Bernt Brandal, avtale med Nasjonalforeningen for folkehelse om å bli med i satsinga deira på demensvenleg samfunn. Ved å inngå denne avtalen uttrykkjer kommunen eit ynskje om å leggje til rette for at personar med demens opplever meistring og inkludering.

Fylkesleiar i Nasjonalforeininga, Ingunn Øye, var til stades og fortalde at dei set stor pris på at Hareid vil bli med på denne satstinga. Avtalen er gratis for kommunen og inkluderer kursmateriell og anna opplæring. (PDF, 2 MB) 

- Vi lever lengre, og framover blir det fleire eldre, og difor også fleire med demens. I dag har i overkant av 2 prosent av innbyggarane i Hareid ein demenssjukdom, og talet vil auke i tida som kjem. Vi ynskjer å legge til rette for at demente føler seg best mogleg inkluderte i samfunnet og kvardagsaktivitetar, fortel folkehelsekoordinator Silje Kiperberg Aksnes

- Eit meir demensvenleg samfunn er avgjerande for mange og bra for alle, fortel demenskoordinator Kamilla Grimstad Hagen.

Personar med demens vert meir sjølvhjelpt og kan leve aktive liv lengst mogleg. Ved å verte møtt med respekt og forståing, vil personar med demens og deira pårørande oppleve tryggheit, friheit og verdigheit. Kunnskapen bidrar til at arbeidskvardagen til personar i ulike serviceyrke vert enklare, og dei som deltek bidrar til å skape eit positivt og inkluderande omdøme for si eiga verksemd og for lokalsamfunnet.

Kommunedirektør Ragnhild Velsvik Berge var også med på signeringa, ho kunne fortelje at dette er veldig positivt for Hareid kommune, og heilt i tråd med kommunen sine planar om å jobbe for eit aldersvenleg samfunn.

Ein del av satsinga er å arrangere gratis kurs for alle som kan kom i kontakt med demente, til dømes tilsette i både offentleg og privat servicenæring. Det er demenskoordinator og folkehelsekoordinator som er ansvarlege for dette, og kurset vert halde 19. september klokka 18-1930. Så om du jobbar til dømes i butikk, som frisør eller drosjesjåfør, eller er frivillig kan du melde deg på allereie no til kamillagrimstad.hagen@hareid.kommune.no. Her er lenke til invitasjon som blir sendt ut neste veke.  (DOCX, 84 kB)